साक्री : फुटबॉलच्या मैदानावर धावणाऱ्या प्रत्येक पावलात जिद्द, प्रत्येक पासमध्ये अचूक नियोजन, प्रत्येक गोलमध्ये विजयाची आस आणि प्रत्येक क्षणात ‘प्रचितीचा विजय’ हे स्वप्न घेऊन मैदानात उतरलेल्या प्रचिती इंटरनॅशनल स्कूल, साक्रीच्या फुटबॉल संघाने उल्लेखनीय कामगिरी करत शाळेच्या क्रीडा-परंपरेत मानाचा तुरा रोवला आहे. १७ वर्षे वयोगटातील मुलींच्या संघाने तालुकास्तरावर विजय मिळवत आपले वर्चस्व सिद्ध केले. तसेच १७ वर्षे वयोगटातील मुलांच्या संघाने सलग दोन सामन्यांत शानदार विजय मिळवत आपल्या क्रीडाकौशल्याची चमक दाखवून दिली. मुलांच्या संघाचा पहिला सामना डी. जी. अग्रवाल संघाविरुद्ध झाला. या सामन्यात प्रचितीच्या खेळाडूंनी उत्कृष्ट सांघिक खेळाचे प्रदर्शन करत ४–२ गोलने दणदणीत विजय मिळवला. त्यानंतर सेयान, पिंपळनेर संघाविरुद्ध झालेल्या दुसऱ्या सामन्यातही प्रचितीच्या संघाने १–० गोलने विजय मिळवत आपल्या विजयी वाटचालीवर पुन्हा एकदा शिक्कामोर्तब केले. या यशामागे विद्यार्थ्यांची मेहनत, चिकाटी, शिस्त आणि संघभावना यांचा मोठा वाटा आहे. त्याचबरोबर खेळाडूंना घडविणारे वैभव सोनवणे सर आणि कुणाल देवरे सर यांचे समर्पित मार्गदर्शनही या यशामध्ये अत्यंत मोलाचे ठरले. मैदानावरील प्रत्येक हालचालीला योग्य दिशा देणे, खेळाडूंच्या क्षमतेला पैलू पाडणे, खेळातील शिस्त आणि आत्मविश्वास रुजवणे तसेच विजयासाठी आवश्यक असलेली सांघिक भावना विकसित करणे, या सर्व बाबींमध्ये प्रशिक्षकांनी घेतलेल्या अथक परिश्रमांचे फलित या शानदार कामगिरीतून दिसून आले.
या नेत्रदीपक यशाबद्दल संस्थेचे संस्थापक अध्यक्ष मा. श्री. प्रशांत पाटील साहेब यांनी विजयी खेळाडूंचे मनःपूर्वक अभिनंदन केले. विद्यार्थ्यांच्या उत्कृष्ट कामगिरीचे कौतुक करत त्यांनी भविष्यातही याच आत्मविश्वासाने, जिद्दीने आणि चिकाटीने क्रीडा क्षेत्रात पुढे जाण्यासाठी शुभेच्छा दिल्या. प्रचितीच्या खेळाडूंच्या या दमदार कामगिरीमुळे शाळेच्या शिरपेचात आणखी एक मानाचा तुरा खोवला असून, त्यांच्या यशाचे सर्वत्र कौतुक होत आहे.
