चिंचवड पोटनिवडणुक : शंकर जगताप यांचे अर्ज अवैध तर, राहुल कलाटे यांचा १ अर्ज ठरला बाद; कोणी किती नामनिर्देशन भरली वाचा संपूर्ण बातमी

पिंपरी – चिंचवड विधानसभा मतदारसंघ पोटनिवडणुक २०२३ च्या अनुषंगाने थेरगाव येथील निवडणूक निर्णय अधिकारी कार्यालयामध्ये मुदतीत ४०  उमेदवारांनी  ५३  नामनिर्देशन पत्र दाखल केले होते. यामध्ये शंकर जगताप यांचा अर्ज अवैध ठरविण्यात आला आहे. भारतीय जनता पक्षाचा मुख्य उमेदवार पात्र असल्याने बदली उमेदवारी अवैध ठरविण्यात आल्याचे कारण देण्यात आले आहे. तर, अपक्ष उमेदवार राहुल कलाटे यांनी तीन नामनिर्देशन दाखल केले असून त्यापैकी त्यांचा एक अर्ज अवैध ठरला आहे.

३३ उमेदवारांचे नामनिर्देशन वैध ठरले असून ७  उमेदवारांचे नामनिर्देशन अवैध ठरले आहे. तर  ५३ नामनिर्देशन पत्रा पैकी ४० नामनिर्देशन पत्रे  वैध ठरली असून १३ नामनिर्देशन पत्रे अवैध ठरली आहेत.

चिंचवड विधानसभा मतदारसंघ पोटनिवडणुक २०२३ च्या अनुषंगाने दाखल झालेल्या नामनिर्देशन पत्रांची आज छाननी प्रक्रिया सुरळीतपणे  पार पडली.  निवडणूक निर्णय अधिकारी सचिन ढोले यांनी यावेळी वैध आणि अवैध ठरलेल्या नामनिर्देशन पत्रांची घोषणा केली. चिंचवड विधानसभा मतदारसंघ पोटनिवडणुक २०२३ साठी नियुक्त करण्यात आलेले निवडणूक निरीक्षक एस. सत्यनारायण आणि निवडणुक पोलीस निरीक्षक अनिल किशोर यादव यांच्या प्रमुख उपस्थितीत पार पडलेल्या या छाननी प्रक्रियेवेळी नामनिर्देशन पत्रे दाखल करणारे उमेदवार आणि त्यांचे प्रतिनिधी उपस्थित होते.

नामनिर्देशन पत्रे  वैध/ अवैध  ठरलेल्या  उमेदवारांच्या माहितीचा  तपशील   :-

एकूण उमेदवार-४०

एकूण नामनिर्देशन पत्रे – ५३

पैकी  वैध उमेदवार- ३३     

वैध नामनिर्देशन पत्रे – ४०

पैकी  अवैध उमेदवार- ०७      

अवैध नामनिर्देशन पत्रे – १३

३३ उमेदवारांपैकी राष्ट्रीयकृत पक्षांच्या उमेदवारांची संख्या – २,

नोंदणीकृत पक्षांचे उमेदवार- ५

अपक्ष उमेदवार – २६