चौफेर न्यूज – करोना संसर्ग देशात वाढत असताना केंद्र सरकारने नव्या मार्गदर्शक सूचना जारी केल्या आहेत. ५ वर्षाखालील मुलांना मास्क घालण्याची गरज नाही, असे केंद्र सरकारने स्पष्ट केले आहे. त्याचप्रमाणे करोना संसर्गाची तीव्रता लक्षात घेता १८ वर्षांखालील मुले आणि किशोरवयीन मुलांसाठी अँटीव्हायरल किंवा मोनोक्लोनल अँटीबॉडीज वापरण्याची शिफारस केली जाऊ शकत नाही, असे केंद्राने म्हटले आहे. स्टिरॉइड्स वापरल्यास ते किमान १० ते १४ दिवस डायल्यूट (पातळ) करून दिले जावे. सरकारने गुरुवारी या मार्गदर्शक सूचना जारी केल्या.
लहान मुले आणि किशोरवयीन (१८ वर्षांखालील) करोना व्यवस्थापनासाठी सुधारित सर्वसमावेशक मार्गदर्शक सूचना आरोग्य मंत्रालयाने जारी केल्या आहेत. ५ वर्षे आणि त्यापेक्षा कमी वयाच्या मुलांसाठी मास्कची गरज नाही. तर ६-११ वर्षे वयोगटातील मुले हे पालकांच्या थेट देखरेखीखाली सुरक्षितपणे मास्क घालू शकतात. १२ वर्षे आणि त्याहून अधिक वयाच्या लोकांनी प्रौढांप्रमाणेच मास्क घालणे आवश्यक आहे. विशेषत: ओमिक्रॉनमुळे करोनाच्या प्रकरणांमध्ये सध्याची वाढ लक्षात घेऊन तज्ज्ञांच्या गटाने मार्गदर्शक सूचनांची समीक्षा केल्याचे मंत्रालयाने म्हटले आहे.
विविध देशांद्वारे उपलब्ध आकडेवारीनुसार ओमिक्रॉन वेरियंटमुळे होणारा संसर्ग हा कमी गंभीर आहे. पण काळजीपूर्वक देखरेख करणे आवश्यक आहे. कारण सध्याची लाट अद्याप विकसित होत आहे. तसेच करोना संसर्गाच्या व्यवस्थापनात प्रतिजैविकांची भूमिका नाही, असे आरोग्य मंत्रालयाने सांगितले आहे.
लक्षणे नसलेल्या आणि सौम्य लक्षणे असलेल्या रुग्णांच्या उपचारांसाठी प्रतिजैविक औषधांची शिफारस केली जात नाही. मध्यम आणि गंभीर प्रकरणांमध्ये आणि अत्यंत गंभीर संसर्गाचा संशय असल्याशिवाय प्रतिजैविक औषधे दिली जाऊ नयेत.
लक्षणे नसलेला आणि सौम्य लक्षणे असलेल्या रुग्णांसाठी स्टिरॉइड्सचा वापर हानिकारक आहे. ते फक्त कठोर देखरेखीखाली रुग्णालयात भरती गंभीर आणि गंभीर आजारी करोना रुग्णांनाच दिले जावे. स्टिरॉइड्सचा वापर योग्य वेळी, योग्य डोसमध्ये आणि योग्य कालावधीसाठी केला पाहिजे. लक्षणे दिसू लागल्यानंतर पहिल्या तीन ते पाच दिवसांत स्टिरॉइड्स घेणे टाळले पाहिजे कारण त्यामुळे व्हायरल शेडिंग वाढते, असे केंद्र सरकारने मार्गदर्शक सूचनांमध्ये म्हटले आहे.