धुळे जिल्ह्यातील प्रचिती इंटरनॅशनल स्कूलमध्ये समाजसुधारक महात्मा जोतिबा फुले यांची जयंती मोठ्या उत्साहात आणि आदरपूर्वक साजरी करण्यात आली. या कार्यक्रमाच्या निमित्ताने विद्यार्थ्यांमध्ये सामाजिक जाणीव, समानता आणि शिक्षणाचे महत्त्व रुजविण्याचा प्रयत्न करण्यात आला.
कार्यक्रमाची सुरुवात महात्मा फुले यांच्या प्रतिमेला पुष्पहार अर्पण करून करण्यात आली. या प्रसंगी शाळेचे संस्थापक आदरणीय श्री प्रशांत भीमराव पाटील, प्राचार्या सौ. वैशाली लाडे, तसेच समन्वयक श्री तुषार देवरे व श्री वैभव सोनवणे यांची प्रमुख उपस्थिती होती. मान्यवरांनी महात्मा फुले यांच्या कार्याला अभिवादन करत त्यांच्या जीवनकार्याचा आढावा घेतला.यावेळी प्राचार्यांनी आपल्या भाषणात सांगितले की, महात्मा फुले यांनी शिक्षणाच्या माध्यमातून समाजातील अन्याय, अंधश्रद्धा आणि जातीय भेदभाव दूर करण्यासाठी मोठे योगदान दिले. त्यांच्या कार्यामुळेच आज शिक्षण सर्वांसाठी खुले झाले आहे.
विद्यार्थ्यांनीही या कार्यक्रमात उत्स्फूर्त सहभाग घेत विविध सांस्कृतिक उपक्रम सादर केले. काही विद्यार्थ्यांनी महात्मा फुले यांच्या जीवनावर आधारित भाषणे केली, तर काहींनी त्यांच्या कार्यावर आधारित नाटिका सादर केल्या. या नाटिकांमधून त्यांच्या समाजसुधारणेच्या विचारांचा प्रभावी संदेश देण्यात आला. तसेच विद्यार्थ्यांनी ‘शिक्षण हेच खरे साधन’ या विषयावर मनोगते व्यक्त केली.या कार्यक्रमात विशेष आकर्षण ठरले ते म्हणजे विद्यार्थ्यांनी साकारलेली महात्मा फुले यांची वेशभूषा. तसेच चित्रकला स्पर्धा आणि वक्तृत्व स्पर्धा यांचेही आयोजन करण्यात आले होते. या स्पर्धांमधून विद्यार्थ्यांच्या सर्जनशीलतेला आणि विचारक्षमतेला चालना मिळाली.शिक्षकांच्या मार्गदर्शनाखाली हा कार्यक्रम अत्यंत सुरळीत पार पडला. शिक्षकांनी विद्यार्थ्यांना महात्मा फुले यांच्या कार्याचे महत्त्व समजावून सांगत त्यांच्या आदर्शांचा अवलंब करण्याचे आवाहन केले.कार्यक्रमाच्या शेवटी सर्व विद्यार्थ्यांनी समाजात समानता, बंधुता आणि शिक्षणाचा प्रसार करण्याचा संकल्प केला. अशा प्रकारे हा कार्यक्रम उत्साहात व यशस्वीरित्या पार पडला.
