पिंपळनेर, दि. १ जून २०२६ : प्रचिती इंटरनॅशनल स्कूल अँड ज्युनिअर कॉलेज तसेच प्रचिती पब्लिक स्कूलचे संस्थापक अध्यक्ष, शिक्षण क्षेत्रातील दूरदृष्टी असलेले नेतृत्व, संस्कारमूल्यांचे जतन करणारे मार्गदर्शक आणि समाजसेवेचा वसा जपणारे आदरणीय व्यक्तिमत्त्व मा. प्रशांत भीमराव पाटील साहेब यांचा वाढदिवस आज विविध सामाजिक, शैक्षणिक आणि सेवाभावी उपक्रमांनी मोठ्या उत्साहात साजरा करण्यात आला.
ज्ञानाची ज्योत पेटवून दिली हजारो जीवनांना दिशा,
सामाजिक कार्यातून जपली माणुसकीची भाषा,
प्रेरणादायी विचारांनी घडविले यशाचे नवे सोपान,
मा. प्रशांत पाटील साहेबांना वाढदिवसानिमित्त मानाचा मुजरा अन् प्रणाम!
आजच्या स्पर्धात्मक युगात शिक्षण देणाऱ्या संस्था अनेक आहेत, परंतु शिक्षणासोबत संस्कार, संस्कृती, शिस्त, माणुसकी आणि सामाजिक जाणीव यांची जोपासना करणारे शिक्षण देणाऱ्या व्यक्ती फार कमी आढळतात. मा. प्रशांत पाटील साहेब यांनी केवळ शैक्षणिक संस्था उभारल्या नाहीत, तर हजारो विद्यार्थ्यांच्या आयुष्याला योग्य दिशा देण्याचे महान कार्य केले आहे.
शाळेत प्रत्येक सण, उत्सव आणि राष्ट्रीय दिवस उत्साहात साजरा करून विद्यार्थ्यांच्या मनात भारतीय संस्कृती, परंपरा आणि राष्ट्रप्रेमाची भावना जागृत करण्याचे कार्य त्यांनी सातत्याने केले आहे. विद्यार्थ्यांमध्ये आई-वडिलांप्रती आदर, शिक्षकांप्रती कृतज्ञता, समाजाप्रती संवेदनशीलता आणि माणुसकीची मूल्ये रुजविण्याचा त्यांचा प्रयत्न नेहमीच उल्लेखनीय राहिला आहे.
ग्रामीण व दुर्गम भागातील विद्यार्थ्यांना दर्जेदार शिक्षण मिळावे यासाठी त्यांनी अत्याधुनिक शैक्षणिक सुविधा, सुरक्षित बससेवा आणि संस्कारयुक्त वातावरण उपलब्ध करून दिले आहे. त्यांच्या या अथक प्रयत्नांमुळे अनेक विद्यार्थ्यांनी शैक्षणिक, क्रीडा आणि सांस्कृतिक क्षेत्रात उल्लेखनीय यश संपादन केले आहे. त्यांच्या कार्याची दखल घेत विविध सामाजिक, शैक्षणिक आणि सांस्कृतिक संस्थांकडून त्यांना अनेक प्रतिष्ठित पुरस्कारांनी सन्मानित करण्यात आले आहे.
वाढदिवसानिमित्त आयोजित कार्यक्रमांतर्गत गरजू व गोरगरीब नागरिकांना कपड्यांचे वाटप करण्यात आले. तसेच ग्रामीण रुग्णालयातील रुग्णांना फळांचे वाटप करून त्यांच्या प्रकृतीची विचारपूस करण्यात आली. या सेवाभावी उपक्रमांमुळे वाढदिवस साजरा करण्याला सामाजिक बांधिलकीची आणि मानवतेची सुंदर जोड मिळाली.
या कार्यक्रमास संस्थेच्या प्राचार्या सौ. अनिता पाटील, समन्वयक राहुल पाटील सर, सर्व शिक्षक, शिक्षकेतर कर्मचारी तसेच प्रचिती परिवारातील सदस्य मोठ्या संख्येने उपस्थित होते. उपस्थितांनी मा. प्रशांत पाटील साहेबांना वाढदिवसानिमित्त मनःपूर्वक शुभेच्छा अर्पण करत त्यांच्या उत्तम आरोग्य, दीर्घायुष्य आणि निरंतर यशासाठी सदिच्छा व्यक्त केल्या.
विशेष म्हणजे याच दिवशी साहेबांची कन्या कु. स्वरा पाटील हिचाही वाढदिवस उत्साहात साजरा करण्यात आला. सर्व शिक्षक, कर्मचारी आणि विद्यार्थ्यांनी स्वराला वाढदिवसाच्या शुभेच्छा देत तिच्या उज्ज्वल भवितव्यासाठी शुभेच्छांचा वर्षाव केला. त्यामुळे आनंदाचा हा दुहेरी सोहळा अधिक संस्मरणीय ठरला.
कार्यक्रमादरम्यान शिक्षक व कर्मचाऱ्यांनी साहेबांच्या कार्याचा गौरव करत त्यांच्या नेतृत्वामुळे संस्थेने केलेल्या प्रगतीबद्दल कृतज्ञता व्यक्त केली. विद्यार्थ्यांचे सर्वांगीण व्यक्तिमत्त्व घडविण्याचे त्यांचे ध्येय आणि समाजाभिमुख विचार हे सर्वांसाठी प्रेरणादायी असल्याचे मत उपस्थितांनी व्यक्त केले.
या संपूर्ण कार्यक्रमाचे उत्कृष्ट संयोजन सौ. अर्चना देसले यांनी केले. सर्व शिक्षक व कर्मचारी यांच्या नियोजनबद्ध आणि समर्पित कार्यामुळे कार्यक्रम यशस्वीरीत्या पार पडला.
उत्साह, आनंद, सामाजिक बांधिलकी आणि कृतज्ञतेने भारलेल्या वातावरणात हा वाढदिवस सोहळा संपन्न झाला. प्रचिती परिवाराच्या वतीने मा. प्रशांत भीमराव पाटील साहेब आणि कु. स्वरा पाटील यांना पुढील आयुष्यासाठी हार्दिक शुभेच्छा देण्यात आल्या.
