मुंबई :- चिंचवड विधानसभेच्या नवनिर्वाचित आमदार अश्विनी जगताप यांचा शपथविधी आज विधिमंडळात पार पडला. यावेळी पोटनिवडणुकीत कसब्याचे विजयी आमदार रविंद्र धंगेकर यांचा देखील शपथविधी पार पडला. विधीमंडळाचे अर्थसंकल्पीय अधिवेशन सध्या सुरू आहे. या अधिवेशनात त्यांनी शपथ घेतली आहे. चिंचवडच्या आमदार अश्विनी जगताप यांनी शपथ घेतली. त्यांनी देखील दिवंगत आमदार लक्ष्मण जगताप यांना अभिवादन करुन शपथविधीला सुरुवात केली.
तर “मी प्रथम माझ्या कसबा विधानसभा मतदारसंघातील मतदारांना नमस्कार करतो. मी रविंद्र लक्ष्मीबाई उर्फ सुलोचना हेमराज धंगेकर विधानसभेचा सदस्य म्हणून निवडून आलो असल्याने” असा उल्लेख करत धंगेकरांनी शपथ घेतली. आमदार म्हणून जे कर्तव्य हाती घेणार ते निष्ठापूर्व पार पाडणार असल्याचं रविंद्र धंगेकर म्हणाले.
चिंचवडमध्ये २००९ पासून २०१९ पर्यंत भाजपचे दिवंगत आमदार लक्ष्मण जगताप निवडून आले होते. लक्ष्मण जगताप हे पहिल्यांदा अपक्ष लढले होते आणि त्यानंतर दोन टर्म ते भाजपकडून लढले. सलग तीन टर्म आमदार असल्याने त्यांनी चिंचवड शहराचा बराच विकास केला. त्यानंतर त्यांचा कर्करोगामुळे निधन झालं आणि त्यांच्या पत्नी अश्विनी जगताप यांना भाजपकडून चिंचवडच्या पोटनिवडणुकीसाठी उमेदवारी मिळाली. त्यादेखील मोठ्या मताधिक्याने विजयी झाल्या. त्यांचाच आज शपथविधी पार पडला.
