पिंपरी : महाराष्ट्र राज्य विद्युत वितरण कंपनीला दिल्ली येथे नुकत्याच आयोजित दहाव्या भारतीय ऊर्जा परिषद- 2016 मध्ये द्वितीय क्रमांकाचा ‘बेस्ट स्टेट पॉवर युटिलिटी’ पुरस्काराने गौरविण्यात आले.
केंद्र सरकारच्या ऊर्जा मंत्रालयाच्या सहकार्याने आणि इंडियन चेंबर्स ऑफ कॉमर्सच्या वतीने आयोजित या परिषदेत केंद्रीय विद्युत प्राधिकरणाचे अध्यक्ष एस.डी.दुबे यांच्या हस्ते महावितरणचे मुख्य अभियंता (वितरण) अंकुश नाळे व वीज दर नियामक विभागाचे अधीक्षक अभियंता मिलिंद दिग्रसकर यांनी हा पुरस्कार स्वीकारला.
महावितरणने सिंगल फेजिंग आणि गावठाण फिडर सेप्रेशनच्या माध्यमातून सुमारे 5,000 मेगावॅट मागणीच्या विजेचे व्यवस्थापन करण्यात लक्षणीय यश प्राप्त केले आहे. याशिवाय अत्याधुनिक पद्घतीने ऊर्जा अंकेक्षण, वीजचोरी विरुद्घ मोठया प्रमाणात कारवाई यामुळे महावितरणच्या वीज वितरण हानीत मोठी घट झाली आहे.
तसेच मोबाईल अॅपच्या माध्यमातून नवीन वीज जोडणी, वीज देयकांचा भरणा, वीज बिलांच्या तक्रारी व अभिप्राय नोंदविणे अशा विविध सुविधा महावितरणने ग्राहकांना उपलब्ध करून दिलेल्या आहेत. या सर्व बाबींची दखल घेत महावितरणला द्वितीय क्रमांकाचा ‘बेस्ट स्टेट पॉवर युटिलिटी’ पुरस्कार प्रदान करण्यात आला.