कलाकारांच्या गाण्यांवर पालक-विद्यार्थ्यांचा ठेका –
प्रचिती इंटरनॅशनल स्कूल
साक्री : प्रचिती इंटरनॅशनल स्कूल अँड ज्युनिअर कॉलेज, साक्री येथे आयोजित आनंद मेळाव्यात एक वेगळाच उत्साह अनुभवायला मिळाला. प्रसिद्ध अभिनेते श्री. विनोद कुमावत, श्री. जगदीश संदानशिव तसेच अभिनेत्री श्रीमती कावेरी पाटील यांच्या लोकप्रिय गाण्यांवर पालक व विद्यार्थ्यांनी ठेका धरत कार्यक्रमाचा मनमुराद आनंद घेतला.
या कार्यक्रमाचे आयोजन इन्चार्ज सौ. स्मिता नेरकर, सौ. कांचन अहिरराव व श्री. कुणाल देवरे यांच्या नियोजनाखाली करण्यात आले. कार्यक्रमास शाळेचे आदरणीय चेअरमन श्री. प्रशांत भीमराव पाटील यांचे मोलाचे मार्गदर्शन लाभले. तसेच प्राचार्या सौ. वैशाली लाडे यांच्या कुशल नेतृत्वामुळे कार्यक्रम अधिकच रंगतदार ठरला. संपूर्ण कार्यक्रमाच्या अंमलबजावणीसाठी समन्वयक श्री. तुषार देवरे व श्री. वैभव सोनवणे यांनी विशेष परिश्रम घेतले.
कार्यक्रमात कलाकारांनी आपल्या गाण्यांद्वारे उपस्थितांना मंत्रमुग्ध केले. त्याचवेळी पालकवर्ग व विद्यार्थ्यांनी कलाकारांसोबत ठेका धरत जल्लोषात सहभाग नोंदवला. संपूर्ण परिसरात टाळ्यांचा गजर, हशा-आनंद व उत्साहाचे वातावरण निर्माण झाले.
कलाकारांनी विद्यार्थ्यांशी व पालकांशी संवाद साधत त्यांचा उत्साह द्विगुणित केला. आनंद मेळाव्यातील हा क्षण उपस्थितांसाठी स्मरणीय व अविस्मरणीय अनुभव ठरला.
एकूणच प्रसिद्ध कलाकारांच्या गाण्यांवर पालक व विद्यार्थ्यांनी धरलेला ठेका हा आनंद मेळाव्याचा मुख्य आकर्षणाचा क्षण ठरला व कार्यक्रमाला वेगळीच रंगत प्राप्त झाली.
